Programang "My Puhunan" Nakaka-bighaning Panoorin

Kagabi, pinanood naming mag-asawa ang programang ito ng ABS-CBN na nagpapakita ng iba't-ibang karanasan at simulain ng ilang mga piling negosyante. Ipinakikita nila kung paano sila nagsimula, nangarap at umasenso. 

Ibig sabihin, hindi hadlang ang kahirapan. Hindi hadlang ang kawalan ng mataas na pinag-aralan. Ang mahalaga ay kung paano tayo mangarap at isagawa ang isang planong mag-negosyo. Kahit sa halagang 500 daan maaari na pala tayong magsimulang mag-negosyo. 

Dahil dito, alam kong hindi ako nagkamali sa naging desisyon ko na subukan ang mag-negosyo gamit ang kaalamang natutunan ko mula sa isang kaibigan. Bagaman, mahirap at isang pakiki-pagsapalaran ang larangan ng negosyo, kailangan natin itong subukan upang malaman kung ito ba ay para sa atin o hindi. Sapagkat, may mga taong sadyang hindi para dito at nakatuon lamang sa pagiging isang empleyado. Mayroon namang pinalad na umasenso sa pagne-negosyo at tunay na naging milyonaryo. Isa pa, kailan ka magsisimulang mag-negosyo? Kung matanda ka na?

Ang kagandahan lang kasi sa negosyo, hawak mo ang oras mo at ikaw mismo ang amo. Siyempre, sa simula ikaw din mismo ang empleyado subalit sa kalaunan, maari ka ng kumuha ng katulong para matutukan mo ng tama ang pagma-manage nito. Natulungan mo na ang sarili mo nakatulong ka pa sa iba. Dito mo paiiralin ang pagiging maparaan mo sa pamamagitan ng pagtuklas ng iba't-ibang produkto at konsepto. Pagtuklas ng mga serbisyong kailangan ng mga tao.

Sadyang napakahalaga na dapat alam mo ang ginagawa mo at mahal mo ito. Dapat determinado ka at malakas ang loob mo lalo na sa mga oras na matumal at mahina ang bentahan. Dapat handa ka rin matuto at isakripisyo ang oras mo. Higit sa lahat alam mo kung paano ang kumpetisyon sa paligid mo. Kaya naman, lalo pa akong na-engganyo na ipagpatuloy ang pagne-negosyo nang mapanood ko ang iba't-ibang segment ng "My Puhunan" na hatid ni Karen Davila.

Paano Kumita Para Makatulong Sa Buhay?

Isa sa problema ng bawat tao ang pera o kabuhayan. Kung mapapansin natin lalong-lalo na sa ating paligid, marami ang mga taong tambay. May mga babae ngunit mas higit ang kalalakihan. Hindi ba tayo nagtataka kung bakit araw-araw ganun ang kanilang ginagawa? Kung hindi tumambay sa kanto, maghapong nasa loob ng bahay na wala naman ginagawa o pinagkakakitaan.

Ano-ano ba ang puwedeng pagkakitaan?

Maraming puwedeng pagkakitan sa maliit o tamang halaga. kailangan lang alam natin kung paano gawin o handa tayong pag-aralan ang sistema. Sa pagnenegosyo, hindi kailangan malaki ang puhunan kundi ang determinasyong matutong mag-negosyo at palaguin ang negosyong gustong-gusto mo. Marami sa atin ang may takot na pumasok sa pagne-negosyo dahil sa kakulangan ng puhunan at kaalaman lalo na yung mga may edad na at walang pinag-aralan. Kaya nga may mga programang tumutulong na maintindihan natin ang tamang proseso sa pagne-negosyo.

Puwede kang magsimula ng Rush ID sa isang maliit na bahagi ng iyong bahay na alam mong wala ka pang kalaban. Ito ang mga kailangan mo:

1. Digital Camera (12MP)
2. Computer
3. Printer
4. Tela na Kulay Pula, Puti at Asul
5. Photoshop o software na pang-ID
   

Sa rush id may kalakihan nga lang ang puhunan pero kung meron ka na ng lahat na ito maaari mo ng simulan hanggang sa kalaunan maaari ka ng magdagdag ng ibang serbisyo na gamit ang computer.

Nais ko lang lang ibahagi ang mga itong nabasa ko para sa mga nagnanais kumita at umunlad. Ito ang mga sumusunod:

1. Paggawa ng mga Pabango
2. Pagluluto ng Puto
3. Paggawa ng Ice Cream
4. Paggawa ng Banana Chips
5. Paggawa ng Aromatherapy Air Freshner
6. Pagluluto ng Donuts
7. Paggawa ng Homemade Fruit Preserves
8. Pagluluto ng Siopao
9. Paggawa ng Chocolate Candies
10. Paggawa ng Gift Baskets
11. Paggawa ng Stuffed Toys
12. Paggawa ng Liquid detergents
13. Paggawa ng Polvoron
14. Pagluluto ng Fish Siomai
15. Paggawa ng Skinless Longganisa

Sa mga ito maaari ka na ng magsimula mula sa halagang P500 hanggang P3,000. Ito ang kumpletong detalye at kaparaanan <click ito>

Sa tamang kita makakatulong ka na. Samahan ng tiyaga at pagpapahalaga sa negosyo uunlad ka.

Tamang Diskarte Sa Buhay

Image Source: williamrodriguez11.blogspot.com

Hindi kaila na sa panahon ngayon kailangan nating mabuhay, ngunit dapat sa tamang pamamaraan. Hindi dahilan ang kahirapan upang hindi tayo mabuhay. Para-paraan lang yan para tayo guminhawa at matugunan ang ating mga pangangailangan, maging ng ating mga mahal sa buhay. Kung hindi mo kaya ang trabahong pisikal, mabigat at hindi mo nakasanayan, dapat mong gamitin ang iyong talino o ang iyong talento. Paganahin ang iyong isip sapagkat malay mo, sa pamamagitan ng iyong kakaibang talento, talino at kakayahan maaari mong mahigitan ang iba o malampasan ang kahirapan.

Marami ang puwedeng pagkakakitaan ngayon. Nariyan ang internet upang tulungan kang makahanap ng iba't ibang idea o paraan ng mga mapapagkakakitaan. Nariyan yung tinatawag ngayong blogging. Tulad nitong ginagawa ko. Sa totoo lang karamihan sa atin ngayon ay nawiwili na sa pagba-blog. Yung iba ay kumikita naman ng maayos lalo na kung magaling silang gumawa ng mga artikulo. Meron namang magaling sa mga bagay na hindi kaya ng ibang tao tulad ng pag-aayos ng computer at kung ano-ano pa. Kaya para labanan ang kahirapan, kilos na at magsimula ka ng gumawa ng paraan!

Sabi nga, hindi makakakain ang tamad. Samakatuwid, dapat tayong kumilos para sa ating ikabubuhay. Dapat tayong magbanat ng buto. Maghanap-buhay para kumita at hindi maging pabigat sa ating bayan. Hindi tayo dapat umasa lang sa ating kapamilya o sa ibang tao, dapat tayong maging self-independent. Hindi sa lahat ng oras ay lagi tayong may masasandalan, malakas at malusog ang pangangatawan. Isipin natin na walang ibang tutulong sa atin kundi tayo sarili natin. Kakain tayo kung kumikilos tayo.

Tulad ko, hindi lang ako umaasa sa iisang linya ng trabaho. Dapat tayong matuto ng lahat ng klase ng trabaho para sa hinaharap. Hindi tayo dapat maging kampante sa mga oras na kaya pa natin o meron pa tayo. Bagkus dapat lagi tayong maging handa sa mga darating pang panahon. Kung may maiimpok, dapat tayong mag-impok. Hindi dapat maging maluho lalo na kung wala naman. 

Ang lahat ng tao ay may kani-kaniyang pangangailangan sa buhay. So, ang mga pangangailangan na iyon ang dapat matugunan, mapa-produkto man o serbisyo. karamihan ngayon ay sunod na sa uso at makabagong teknolohiya kung kaya dapat hindi rin tayo pahuhuli. Ganito na ang labanan sa mundo. Kawawa ang mga hindi interesadong mag-aral o matuto ng mga bagay na nakikita natin ngayon. Ang mga kabataan ay dapat mamulat na sa mga makabagong teknolohiya na ginagabayan ng mga magulang. Turuan silang matutong magnegosyo sa murang edad at turuan maging responsable sa kanilang buhay. 

Bilang mga magulang, ipakita natin sa kanila ang tamang paggawa.

San Ka Pupunta?

Meron akong kapitbahay, kinuha niya ang mga address ng lugar na pupuntahan niya. Mga agency siguro iyon na aaplayan niya sa bandang Harrison Plaza, Manila. Nagpa-xerox sa 'kin ng kanyang mga dokumento, 26 pages lahat. Halagang 50 pesos ang binayaran niya sa akin. Kailangan daw niyang puntahan ang mga iyon. Mga patungong Taiwan ang hinahanap niyang trabaho dahil ayaw na niya sa Middle East. Hanap niya ang malaking sahod. Ikaw malaki ba sahod mo sa ibang bansa?

Umaasa siyang agad na makakaalis. Kumita ng malaki at mabayaran ang sinasabi niyang mga utang. Lahat naman tayo may utang. Tinanong niya ako kung balak ko pang umalis. Sabi ko: "Parang mahirap na yatang umalis." Nasanay na ako sa buhay sa Pinas. Mahirap pero parang mas mahirap malayo sa pamilya. Ikaw, uuwi ka ba dahil sa lungkot? Kung nasa ibang bansa ka na rin lang, pagtiyagaan mo na ang job mo at ang kalagayan mo total pag umuwi ka naman, "one day millionaire ka naman". 

Ako nagtitiyaga sa maliit na business na minsan malaki ang kita minsan tama lang. Ganon talaga ang buhay sa Pinas. Kailangan lang nating maging marunong sa tamang pag-budget ng pera. Minsan naiisip natin na sumuko pero nanaig pa rin ang pangangailangan nating mabuhay dahil nga may umaasa sa atin. Pero, isipin mo marami namang tulad nating pinoy ang hindi umalis ng bansa, pero naging maganda ang buhay sa Pinas.