Si Bagyong Falcon

Link ng Image: Baha

Sa halos limang araw na nakalipas, magmula ng magsimulang manalasa si Bagyon Falcon, maraming nangyari sa ating paligid na hindi kanais-nais. Kahapon, narinig ko sa radyo balita (dahil wala kaming kuryente) ang mga kaganapan sa buong bansa particular sa kamaynilaan. Halos naapektuhan ang mga poste ng kuryente dahil sa ilang malalakas na hangin na dulot ni Falcon. Nariyan yung nawalan ng mga tahanan. Nariyan yung mga pagbaha sa iba't ibang sulok ng bansa, lalo na sa bandang Mindanao. Matindi ang mga pagbaha sa Mindanao. Mayroong mga inilikas na galing sa mga naapektuhan ng baha. Narinig ko rin na may ipo-ipo rin na dumaan sa lugar sa Quezon City kung saan naging dahilan ng pagkabuwal ng isang puno at pagkasira ng isang kulungan ng mga priso at bahay. Ideneklarang walang pasok ang ilang mga kawani ng gobyerno kahapon liban sa mga nagbibigay ng serbisyo tulong sa ilang mga kababayan natin.

Mahirap na ring sumakay kaya halos ala-una na ng madaling araw nakauwi ang aking pamangkin galing sa trabaho. Ito ay dahilan ng baha. Bagaman, hindi kalakasan ang ihip ng hangin sa ilang bahagi ng Taguig, malakas at tuloy tuloy na pag-ulan ang idinulot ni Falcon. Nariyan yung titigil sandali na akala mo'y wala na, pero maya-maya ay bubuhos na naman ang malakas na ulan. Mahina at lalakas, ganyan si Bagyong Falcon. Hindi ko na nasubaybayan ang lahat ng balita dahil sa kawalan ng kuryente kaya radyo ng sasakyan ang ginamit ko upang marinig kung ano ang kalagayan ng panahon.

Noong isang araw, nawalan kami ng kuryente dahil sa matinding ulan. Mga bandang alas 8 na ng gabi nang mawalan ng kuryente dito sa amin. Umabot din ng dalawang araw na wala kaming kuryente dito sa amin sa Brgy Katuparan, sa Taguig. May mga nabaha din dito sa amin, sa mga kalapit barangay lang. Ang pinakamasama pa ay may mga magnanakaw ng kawad ng kuryente na nanamantala sa madaling araw, pinagpuputol ang ilang mga wire at kinuha ang mga tanso nito. Napakabait talaga. Kaya naman, umabot ng dalawang araw na wala kaming kuryente. Dahil sinuri pa ng mga tauhan ng MERALCO ang nangyaring nakawan ng mga wire. Wala talagang pinipili na ang mga magnanakaw ngayon. Kanina lang madaling araw naibalik ang aming kuryente.

Paano kaya naaatim ng kanilang konsensya na ang ipinakakain nila sa kanilang pamilya ay galing sa nakaw.

Sadyang mahirap ang mga panahong ganito. Minsan makakaisip ka na mag-stock ng mga de-lata at mga pagkaing tatagal ng isang buwan para kapag may ganitong bagyo o anumang kalamidad, may makakain ang pamilya mo. Hindi mo na kailangan tumakbo at maghagilap ng mabibilhan ng pagkain lalo na sa mga alanganing oras. Napakahalaga rin na may stock ka ng kandila para sa panahon ng walang kuryente.

May time na naiisip mo ng manalangin. Ang tao nga naman, sumasambit lang sa Diyos kapag may mga kalamidad. Pero kapag wala naman, grabe ang pagpapakasaya. Kaya, ang mga kalamidad ay isang pagpapa-alala ng diyos sa atin. Kung matindi ang init, binibigyan tayo ng ulan. Kung sobra na ang ulan, darating ang tag-init para tayo ay mainitan, pero may mga taong hindi nakakaintindi. nayayamot at kung ano-ano ang mga sinasabi. Bagkus, dapat maging handa na lamang tayo sa mga ganitong sitwasyon. Bahagi na ng ating buhay ang ganitong mga kalamidad. Wag nating hintayin na bigyan pa tayo ng Diyos ng mas matindi pa rito dahil tiyak hindi na natin kakayanin. Kahit papaano ay sobrang naging maawain ang Diyos sa atin lalo na dito sa bansang pinas.

Salamat at kahit sa mga panahaong ito, kumpleto pa rin ang aming pamilya. 

Kung anuman ang mga naging kaganapan sa ating bansa lalo na sa Mindanao, sana kumpleto pa rin ang pamilya ng ilang mga kababayan natin. Sana, mayroon pa rin silang nakakain sa araw na ito. Sa mga nawalan ng mga mahal sa buhay, isang pakikidalamhati ang nais kong ipaabot. Sana'y makayanan nila ang mga pagsubok ng ating buhay. Sa kabila ng lahat, nawa'y maging malakas pa rin ang kanilang pananampalataya sa Diyos.

Basahin mo ito balitang ito: 50000 katao ang lumikas bilang kagradagan.

Ulan

Umulan na naman ngayon dito sa amin sa Taguig dakong alas 7:30 ng gabi. Malakas ang buhos ng ulan kung kaya umapaw na naman ang mga kanal. May mga naligo sa lakas ng ulan. Ako naman ay nagsahod para pambuhos ng mga halaman. 

Ngayon, alas 8:10 ng gabi medyo mahina na ang ulan. Salamat naman at hindi gaano nagtagal ang ulan. Para bang nakakatakot kapag umuulan. Isang pangambang hindi maiiwasan. Dito sa Pinas, bagyo ang pinaka-matinding pangamba ng tao. Dahil kapag bumabagyo, tiyak matinding pagbaha na naman ang laman ng mga balita. Nariyan kasi ang ma-stranded dahil walang masakyan lalo na yung mga nasa opisina. Siyempre, iwas baha ang mga pampublikong sasakyan. Saka, nagdudulot din ito ng matinding traffic sa halos lahat ng sulok ng kamaynilaan. Bakit nga ba tuwing umuulan, ang lahat ng tao o sasakyan ay para bang nagmamadali? Kumpara kapag tag-init.

Sana maging payapa ang gabing ito para sa ating mga kababayang pinoy. Pero sana maging handa rin ang lahat lalo na kapag may babala ng bagyo.

Bagyo: Chedeng

Lumabas ako saglit patungong Cebuana Lhuiller upang kumuha ng pera padala. Habang naglalakad, napansin ko ang maiitim na ulam na tanda ng pagbugso ng ulan. Naisip ko na ito na marahil ang simula ng bagyong Chedeng na namataan ng PAGASA. Kaya nagmadali ako. Tamang-tama ang dating ko (4:45pm na) dahil ako ang panghuling customer.

Nang matapos ako (halos 30 minutes), agad akong lumabas at nagmamadaling umuwi. Tamang-tama rin, medyo pumapatak na ang ulan. Sabagay, malapit lang naman ang bahay namin sa Cebuana (yan ang advantage), madali akong nakarating. Medyo nabasa rin ako ng bahagya ng pagbuhos ng ulan.

Sana hindi pa ngayon ang paglakas ng ulan. Sana hindi maging sanhi ang bagyong ito ng anumang sakuna o pagbaha sa mga ilang lugar. Upang kahit paano, maging maayos pa rin ang pamumuhay ngayon o bukas.

Bagyo: Bebeng

Siguro mga tatlong araw na ang nakalipas nang mabasa ko ang tungkol sa parating na bagyong ito mula sa PAGASA. Medyo, naalarma na agad ako at alam kong anumang oras magkakaroon na naman ng malakas na pag-ulan. Kahapon nga, ay nagsimulang umulan bandang hapon na(dakong alas 6) at lumakas ng mga ilang minuto dito sa amin sa Taguig. Katunayan, ang aming kanal ay umapaw dahil hindi nakayanan ang biglang pagbuhos ng ulan, o maaaring meron bara kaya hindi maayos na makadaloy ang tubig. 

Parang nakakaramdam na naman ako ng takot dahil nga sa mga nakaraang bagyo na naranasan namin. Halos tuklapin ang lahat ng atip sa bahay at ang sa sipol pa lang ng bagyo, nakakatakot.

Siyempre, kapag may bagyo senyales na naman ito ng sakuna at aksidente, pagbaha at pagkasira ng mga pananim o ilang mga ari-arian. Siyempre hindi na naman safe ang magiging kalagayan ng bansa pati ang mga pinoy lalo sa mga probinsiya. Siyempre maiisip mo na naman kung kamusta na kaya ang kalagayan ng mga mahal mo sa buhay na nasa ibang sulok ng bansa. 

Hanggang ngayon manaka-naka pa rin ang pag-ulan dito sa amin sa Taguig City. Bahagyang napawi ang matinding init dahil sa pag-ulan at naging malamig ang simoy ng hangin. Kahit paano, nakatulong ang ulan para mawala ang sobrang init na kahit may electric fan ay hindi pa rin makayanan ang init sa loob ng bahay o sa labas man.

Ang mga nasa abroad na mga pinoy, mag-iisip na naman kung ano na ang kalagayan ng kanilang mga mahal sa buhay dito sa 'Pinas. Ang pinakamataas na signal na ipinalabas ng PAGASA ay nasa signal # 2 sa ilang lugar ng Pilipinas.