Sayang, Gaganda Pa Naman!

Image Source: Yahoo.com

Ito ang isang kuha na tila nagpapakita ng pagiging seryoso umano ng ating gobyerno laban sa mga pekeng produkto na umano ay mula sa ibang bansa.

Mukhang kaunti lang ang mga ito na makikita natin sa litratro. At malamang marami pang kasama ang mga iyan na hindi makikita dyan. Tapos, hindi naman talaga makikitang sinusunog. Hindi maiiwasang hindi magduda ang isang tulad ko o sinuman dahil hindi na bago ang ganitong propaganda. Marahil ilan sa mga iyan ay hindi pa nasira at puwede pang pakinabangan ng ilang empleyado na gustong kumita..

Ito ba'y pagpapakita na talagang seryoso na ang ating pamahalaan na sugpuin ang smuggling, pamimirata o ang tinatawag na paglabag sa Intellectual Property Rights ? O isa lamang itong palabas. 

Alam natin na palapit na ang kapaskuhan kaya pumapasok na naman ang mga pekeng bag at kung anu-ano pa na puwedeng ibenta sa murang halaga. Kapag maganda at mura patok yan sa masa! Sa ganitong pagkakataon san pa ba pupunta ang mga pinoy kundi sa mga lugar na tulad ng Baclaran at Divisoria. 

Honestly, kahit kapamilya ko napapabili ng mga ganyan dahil mas mura kumpara sa original. Hindi naman kasi seryoso ang pamahalaan mula pa noon kaya hindi rin nila masisisi ang mga taong tumatangkilik ng mga pekeng kagamitan.

Pero, dahil mainit sa mata ang mga ganito ngayon, kalimitan sa mga probinsiya na lang ito ibinebenta kung saan hindi pa mahigpit ang ilang bayan. Pero kahit dito sa kamaynilaan, marami pa rin ang malalakas ang loob na magbenta ng mga ganito dahil may mga protektor sila.

Smuggled Hot Cars and Motorbikes

Ang buhay nga naman, hindi mo rin talaga masasabi na merong mga pinoy na likas na magagaling.....magnakaw. Sa kuwentong ito naalala ko yung palabas na "Gone in 60 seconds". Pinagbidahan ng paborito kong artista na si Nicolas Cage at siyempre ng isang magandang leading lady na si Angelina Jolie. Sa movie, ipinakita doon kung paano sila dumali ng mga magaganda at magagarang sasakyan(Cars).

Ano naman ang kaugnayan ng palabas? Akalain mo yung isang Harley Davidson na P3.4 million($79,000) na pag-aari ng isang Hollywood writer e nadali at nang hinanap dito lang sa bansa natin natagpuan. Mantakin mo pati ang Mindanao ngayon ay medyo pumangit na ang imahe dahil dito. Sa Cagayan de Oro, sa Talacag Bukidnon natagpuan ang nasabing motor o "big bike". Ang hindi pa maganda sa pandinig ay ang umano'y pagiging malakas ng isang taong ito na hinihinalang smuggler sa BOC o Bureau of Customs. 

Akala ko sa Manila lang maraming "Gone in 60 Seconds", pati na rin pala ang Bukidnon meron na rin. Kawawang Mindanao na aking pinagmulan. 

Bakit nadawit ang customs? E hindi na bago ang ahensiyang ito sa pandinig ng maraming pinoy pagdating sa mga kalakal galing sa ibang bansa. Masarap yatang magtrabaho dito. Gaganda ang buhay ng mo pag dito ka nagtrabaho. Kaya parang taas-noo ang mga taong nagtatrabaho dito dahil sarap ang buhay ng mga nasa posisyon. Isang pasanin ni P-Noy ang ahensiyang ito.