Search Bar

Showing posts with label Ipatupad ang batas. Show all posts
Showing posts with label Ipatupad ang batas. Show all posts

Tuesday, April 22, 2014

Barangay Ordinances, Epektibo Pa Ba?

Nitong umaga, naglilibot sa bawat kalye ang mga tauhan ng barangay kasama ang ilang miyembro ng mga kagawad. Ipinaaalam nila sa mga residente ang ilang ordinansang ipinatutupad nila para sa kaayusan ng barangay. 

Ayon sa kanila, bawal na ang sugal, sabong, mga asong gala, at mga nakaparadang sasakyan sa kalsada. Bawal din ang mag-inum sa kalsada at mag-videoke. Tapos, may curfew na rin sa mga kabataan. Dagdag pa, ipinatutupad na rin ang tapat-mo linis-mo para sa kalinisan.

Napakagandang pakinggan ang ganitong mga ordinansa lalo na kung mahigpit na naipapatupad. Saka, lalo na kung maisasaayos talaga ang kapaligiran. Subalit, ano kaya ang magiging reaksiyon ng mga tao ukol rito? Samantalang, yung mga tao sa paligid na nakarinig sa oras na iyon ay tila wala lang sa kanila.

Bilang isang residente, malaking tulong ito para mapaganda at maisa-ayos ang paligid. Magkaroon ng disiplina ang mga tao simula sa kanilang tahanan hanggang sa labas ng bahay. Maging responsable at disiplinado gaya ng mga taong nakatira sa isang pribadong lugar. 

Bawal Ang Sugal, Sabong At Inuman

Una sa lahat, maganda na masupil ang mga ganitong uri ng gawain ng ilang mga residente rito sa amin. Ang sugal tulad ng tong-its, ay isa sa gawain hindi lang ng mga kalalakihan kundi kasali na rin ang mga kababaihan. Madalas, dito nagkakaroon ng away. 

Tapos, madalas may mga babae naman nagiging adik na kaya hindi na naasikaso ang pamilya at ang kanilang tahanan. Madalas, sa pabarya-barya, di alam na malaki na rin ang natatalo hanggang sa wala ng pambili ng pagkain para sa mga anak.

Ang sabong bagamat gawain na ng mga kalalakihan, hindi nakakatulong sa pamilya. Malaki ang pustahan sa ganitong larangan ng sugal. May mga padre de pamilya na mas inuuna pa ang pumusta sa sabong kaysa sa pangangailangan ng kaniyang pamilya. Wala na ngang trabaho nagagawa pang magsugal. Kahit puhunan sa kanilang negosyo nagagalaw na hanggat wala na rin kapital para sa mga paninda. 

Ang inuman, madalas pinagmumulan ng away o gulo. Lalo na nag mga ngayon, hindi lang mga matatanda ang umiinom, kadalasan mga kabataan na rin at ilang menor de edad. Kapag lasing na, nandiyan na yung trip-trip nila at naghahamon na kung minsan at madalas tuwing may dadaan gustong pang kursunadahin. Minsan, sila sila din ang nag-aaway. Minsan sila din ay napapag-tripan dahil hindi na maganda ang lumalabas sa bibig nila.

Bawal Ang Mga Asong Gala

Ito ang isa sa mga sakit sa ulo namin minsan sa aming daanan. Sa tuwing lalabas kami ng kalye, nandiyan ang kabi-kabilang tae ng aso. Minsan, kahit alam na ng may-ari na aso nila ang tumae wala lang silang paki-alam. Hindi man lang bugawin. Natural, dahil tapat mo, ikaw na lang ang maglilinis. Abisuhan mo man, sila pa ang galit at tila nagmamalaki. Kaya, minsan wala kang choice kundi abugin, batuhin o hatawin ang mga asong gala. 

Kapag ang aso nila ay nakakagat, wala din silang paki-alam. Kahit sa gastusin para sa anti-rabies para dun sa nakagat, hindi sila nag-aatubili na makipagtulungan. Yun bang nag-alaga sila pero pinagagala din naman! Ano pa ang saysay at nag-alaga sila ng aso ngunit hindi naman sila responsableng may-ari?

Bawal Ang Videoke

Hindi masama ang kaunting kasiyahan sapagkat lahat naman ng tao ay ginagawa ito. Bilang isang kapit-bahay, naiintindihan natin kung ano ang kanilang ipinagdidiriwang subalit ang masama ay yung halos magdamag na nga ay umaabot pa hanggang madaling araw. Hindi naman tama na pati kapit-bahay ay napupuyat pa dahil sa tindi ng ingay na dulot nito. Bukod sa malakas na wala pa sa tuno. 

Tandaan natin na hindi lang tayo ang tao sa mundo. Ang ilan ay kailangan ng sapat na pahinga dahil pagod sa trabaho. May trabaho pa kinabukasan at kailangang kumayod para sa pamilya. Ang ilan ay may sakit at kailangan ang katahimikan sa paligid. Ang ilan ay may mga maliliit na bata na hindi nakakatulog ng mahimbing dahil sa tindi ng ingay nito. Yung iba walang paki-alam kapag nagsimula na, kahit oras na para magpahinga ay sige pa sila.

Ang kaunting kantahan ay hindi masama basta ilagay lang sa tama. Siguro tama na yung hanggang 10 o 12 ng gabi. Tapos pahinga na. Hindi ba lahat ay masaya?

Bawal Ang Nakaparadang Sasakyan Sa Kalye

Malaking tulong ang ordinansang ito hindi lang sa barangay kundi sa mga residente rin. Hindi masama kung saglit lang ang pag-parada ng sasakyan sa daanan. Ang masama yung ginawa mo na itong paradahan na tila pag-aaari mo na. Tapos kapag may pumaradang iba ay magagalit ka. Ano ba talaga ang tama kapag may sasakyan ka? Hindi ba dapat may garahe ka rin dahil may sasakyan ka?

Isa pa, makakatulong ang ordinansang ito para sa hindi inaasahang sunog. Sa dami ng nakaparadang sasakyan sa daanan, hindi tuloy maka-daan ang bombero sa kalye dahil kung hindi single parking, naka-double parking pa ang mga sasakyan. Pagkatapos, dahil hindi naapula ang sunog, sa mga bombero pa ang sisi sa huli.

Kapag, may pasyenteng kailangan maitakbo sa ospital, mas maililigtas ito kung malinis ang daanan sa ma nakabambalang sasakyan.

Curfew Para Sa Mga Kabataan

Ito ang tama at kasagutan sa lumalalang bilang ng krimen sa bansa. Ito ay makakatulong para ang mga kabataan ay mailayo sa bisyo, droga at ilang masasamang aktibidadis. 

Madalas, ang mga kabataan ay nasa labas kahit gabi na. Maingay, nagtatawanan at nagkakantahan na halos nakakabulahaw na sa mga kapit-bahay. Kapag-sinaway mo, pambabastos lang ang abutin mo. Imbes na tumigil, tila nang-aasar pa. Araw-gabi nasa kalye, at hindi matigil sa pakikipagharutan lalo na ang mga kababaihan. 

Dahil grupo sila, madalas nakikipag-away sa ibang grupo. Nangungursunada ng mga dayo na dumadaan lang sa tabi nila. At minsan, droga na ang pinagkaka-abalahan. Natututo sila ng mga katarantaduhan. Wala ng galang sa magulang at sa kapwa tao. Mahilig magkalat at magsulat sa mga mga dingding na hindi sa kanila. Imbes na makatulong sa kanilang pamilya, mga pabigat ba. Maagang nagsisipag-asawa kahit wala naman trabaho o maipalamon sa magiging pamilya nila. Nagiging batugan at malamunin lang ng pamilya.

Sana ang hangarin na ito ng aming barangay ay maisakatuparan. Hindi upang masabing sila ay magaling sa salita ngunit kulang din sa gawa. Hindi yung puro papogi na lang bilang paghahanda sa susunod na pagtakbo nila. Hindi yung magaling lang magtatag ng ordinansa pero mga numero unong violators din pala.

Sunday, December 4, 2011

Ang Batas ay Batas

Sa balita ngayon, isa na namang Pilipino ang mabibitay sa Disyembre 8 2011, dahil sa illegal na droga sa bansang Tsina o China. Kaya naman, tutungo si Bise Presidente Binay upang tulungan ang ating kababayan na mabigyan pa ng kapatawaran. Isang hakbang na umaasang mabibigyan pa ito ng pansin ng pamahalaan ng Tsina. Subalit, mahirap na siguro ang ganitong sitwasyon gayong alam naman natin na sadyang napakahigpit ng Tsina pagdating sa kanilang batas.

Hindi na siguro makakatulong ang Humanitarian approach sa pagkakataong ito lalo na't may mga hindi pagkakaunawaan ang dalawang bansa sa ilang bagay. At hindi ganun kadali na malutas ang kaso tungkol sa droga. Kaya mahirap na paasahin mo pa ang pamilya ng akusado.

Kaya naman, panawagan natin sa ating pamahalaan ay maging seryoso sa pagpapatupad ng ating sariling batas. Paigtingin ang batas laban sa mga droga at sa mga nagpupuslit ng droga. Maging mahigpit din sa mga dayuhan na ang lalakas ng loob na magdala ng droga dito sa ating bansa. Palibhasa marami kasi sa ating mga kawani ng gobyerno ang kayang tapatan ng salapi kaya ganun na lang sila kung umasta dito sa ating bansa. Kilala na kasi ang bansa natin sa "lagay system". Marami rin ang protektor.

Dapat bitay din ang parusa ng mga drug pusher dito sa atin. 

Dahil sa kahirapan, marami pa rin sa ating mga kababayan ang nagiging biktima ng mga drug pusher. Lalo na yung mga nangangarap na magtrabaho sa ibang bansa. Hindi na bago ang ganitong pangyayari. Kailan pa kaya matututo ang mga Pilipinong magtrabaho ng maayos. Hindi lahat ng karangyaan ay nakukuha sa pagtutulak ng droga. Lalong hindi makakabuti ang droga sa bawat tao. Hindi rin sa lahat ng panahon na makakaligtas ka laban sa batas.

Aanhin ang awa kung marami ang maaapektuhan at magiging biktima ng iligal na droga. Paano magiging maayos ang ating bansa kung baluktot naman ang sistema ng ating batas. Paano matututo ang bawat pinoy kung walang katiyakan ang ating batas. At hindi tayo magiging panatag hanggat hindi nalulutas ng ating gobyerno ang mga kasong ilang dekada ng nagdaan at idagdag pa natin ang mga kasalukuyang kaso ng mga dating administrasyon. Idagdag pa nating ang kaso tungkol sa Maguindanao Massacre kung saan patuloy pa ring umaasa ang mga pamilya ng biktima ng hustisya.

Nagpapatunay lamang na hindi kaya ng ating pamahalaan ang maging seryoso sa batas na kanilang ginawa upang mapabuti ang ating bansa at maprotektahan ang ating mamamayan. Tanging ang mga mayayaman at may pera lamang ang tunay na nakikinabang sa batas ng ating bansa na mapapansin natin sa mga mga kasalukuyang issue.
Enhanced by Zemanta