Bilang Isang Concern Citizen

Martes ng umaga (Jan 17, 2012), hinatid namin sa NAIA Terminal II ang nanay ko. Hindi muna ako umalis hangga't hindi ako siguradong wala ng problema si mother sa airport. Marami kasing paalis kaya medyo mahaba ang pila papasok.

Nang umuwi na kami, on the way sa Villamor Air Base, mahina lang ang patakbo ko ng sasakyan. Siyempre dahil hindi na ako nangamba sa flight ng mother ko gaya ng lumabas kami na nagmamadali ako. Along the way, nauna sa akin ang isang taxi cab galing ng Terminal 3 ng mahagip niya ang isang motor na paliko patungong Villamor. Kitang-kita ko pa kung paano sumimplang ang dalawang sakay ng motor kung saan mas nasaktan ng husto ang babaeng angkas dahil sa biglaang aksidente dahil sa pagbaliktad nito.

Akala ko titigil ang taxi para aregluhin ang ginawa niya kasalanan. Nang maramdaman kong parang ayaw niyang tumigil at balak pang tumakas, agad kong binilisan ang takbo ng sasakyan para harangan siya sa unahan. Talagang hindi ko siya hinayaang makatakas. May lumapit  na naka-motor din at isang kotse sa gilid naman ng taxi para tuluyan siyang ma-corner sa isang tabi. Agad akong bumaba ng sasakyan at nilapitan siya para kausapin. Bumaba din ang may-ari ng kotse at nagpakilalang abogado. Sinabihan siyang panagutan na lang ang nangyari kaysa tumakas upang hindi lumaki ang kaniyang kaso. Parang may takot na bumakas sa mukha ng taxi driver dahil akala siguro ay mabubugbog siya. Tinawag ko ang driver ng motor para magka-usap sila tungkol sa problema. Pilit pa siyang (Taxi driver) tumatanggi na hindi siya tatakas.  Kasalanan naman talaga niya dahil agad siyang pumihit pakaliwa na siya naman dating ng motor. Kumbaga, testigo ako sa nangyaring aksidente pati yung mga kasunuran naming sasakyan na agad din tumigil at nakiramdam.

Siguro kung hindi ako naglakas ng loob na iharang ang sasakyan ko sa harap ng taxi pati ang mga kasunuran ko sa gilid niya, tiyak kawawa yung nadisgrasya. Hindi na rin ako nagtagal at hinayaan ko na ang nagpakilalang abogado ang kumausap sa kanila. Kahit paano, alam kong hindi magiging dehado ang mag-asawang sakay ng motor sa disgrasyang tinamo nila. 

Naisip ko, kung minsan parang ayaw nating maging involve sa mga away o anumang gulo. Pero sa ganitong sitwasyon, hindi ko natiis dahil naisip ko, paano kung ako naman ang nabangga ng taxi yun? Pero, dahil ayokong mangyari sa akin iyun, kaya ginawa ko ang bagay na at hindi ako umalis na may dalang konsensiya. Hindi ko na alam kung ano ang nangyari ng iwan ko sila.

Bagyong Juaning: Maulan Pa Rin Ngayon

Image Source: www.yousaytoo.com

Nung isang araw lang nagsimulang umulan, hindi ko akalain bagyo na pala. Tinapos lang ang SONA ni Pangulong Aquino bago umulan. Nakita ko ang matinding buhos ng ulan kung kaya't napababa ako kahapon at nanood ng balita. 

Laman ng balita ang tungkol kay Juaning. Kahapon nga, nakita ko sa television ang  disgrasyang nangyari sa Dimple bus na nahulog mula sa Skyway. Patay ang driver at ilang pasahero liban sa konduktor. Sabi ng konduktor, naipu-ipo daw sila kung kaya nawalan ng kontrol ang driver ng bus kaya ito nahulog mula sa Skyway. Kawawa naman ang isang amang seaman na pasakay na sana ng Barko na nasama sa disgrasya kung kaya galit ang mga anak nito.

Sa kabilang banda naman, sa may ayala, sa tunnel naman ay limang sasakyan ang nagsalpukan dahilan din ng bus na mabilis ang takbo sa kabila ng madulas na daan dahil sa ulan.

Ilan lang ito sa mga nangyari sa kasagsagan ng bagyong Juaning. Saan mang sulok, halos dinaanan ni Juaning. Ang matindi naman ay sa bandang Bicol.

Mapahanggang ngayon ay maulan pa rin. Hindi na ako tumuloy sa aking lakad upang maiwasan ang anumang sakuna sa daan.

Kapag ganitong maulan o may bagyo, hindi natin alam ang puwedeng mangyari. Halos nagmamadali ang lahat ng tao, sa pag-uwi, sa pagsakay maging ang mga pampasaherong jeep at pribadong sasakyan nagmamadali rin. Gawa kasi ng baha, kapag maulan tiyak may baha sa ilang lugar at ito ang iniiwasan ng mga sasakyan. Kapag maulan, maraming stranded sa daan. Nagiging magulo ang daloy ng trapiko. Wala sa ayos ang lahat ng bagay, marami ang nadidisgrasya at kabi-kabila ang nagiging problema.

Dahil maulan, medyo malamig ang simoy ng hangin. Nakakatulong para sa mga maiinit ang ulo. Nakakawala ng pagod o stress. Marami ang naliligo sa ulan dahil malamig. 

Sana maging maayos pa rin ang lahat. Maraming problemang iiwanan si Juaning pero salamat pa rin at hindi malaki ang pinsala nito sa atin kumpara sa Bagyong Ondoy.